Nagaeaum ro barangay council it Bacan, Banga nga magiging mas polido eon ro ginapatigayon makaron nga pag-construct sa mga lubak-lubak nga karsada sa nasambit nga lugar.
Suno kay punong barangay Allen Robelo it Bacan, Banga nga sakop it proyekto ro kapin sa 170 nga span it karsada halin sa boundary it Taba-ao ag Bacan kun sa siin ginataw-an it proyoridad ro mga portion it karsada nga may lubak-lubak ukon may mga mabahoe nga buho agud nga mapahagan-hagan ro kalisod it mga motorista.
Apela nana nga kabay nga ro gina construct nga karsada hay makasarang eon sa kabug-at it mga mabahoe nga trucking nga naga-agi nga kargado it mga baeas.
Nasayuran nga ro proyekto hay may pondo nga naga abot sa 4.9 milyon pesos nga direktang naghalin sa taeatapan ni aklan governor Joen Miraflores.
Ginsuhestiyon pa nana sa pamunuan it provincial engineering office ukon PEO nga butangan it drainage sa magtimbang it karsada.
Madumduman nga pirmeng ginareklamo ro nasambit nga portion it provincial road bangud nga madali nga masamad nga nagiging takaw aksidente sa mga motorista ag perwisyo sa mga residente.
Ginabasoe sa insidente ro pag agi it mga gina alegar nga overloaded nga mga truck nga puno it baeas halin sa quarry site.
Ma-obserbahan nga sa tuo nga portion it karsada ro maabu nga damage.
