KALIBO, Aklan—Nagapadayun ro imbestigasyon it kapulisan sa makangieidlis nga kamatayon it sangka construction worker matapos nga tadtaron it buno ag eabu it owa pa nakilaea nga suspek ko tungang gabi-i it Martes sa Sitio Batiano, Brgy. Maloco, Ibajay.
Patay eon ag nagapaligos sa kaugalingon nga dugo kat makita it mga kaeapitbaeay ro biktimang si Benedict Garzon, alyas budok, 37 anyos ag residente it nasambit nga lugar sa anang eugban sa sueod it andang baeay.
Suno kay PCapt Rajiv Salbino, OIC chief of police it Ibajay Municipal Police Station nga ginaboeobanta nga nag-angkon it masobra sa 30 nga igo it buno ag eabu sa nagkaeain-eain nga parte it eawas ro biktima partikular sa naibabaw nga parte it anang eawas base sa intial nga findings it ginpatigayon nga post mortem examination.
Ginasugid nga may ginatumod eon nga persons of interest ro Ibajay PNP sa krimen, apang owa anay raya ginpangaeanan bangud nga nagapadayun pa ro imbestigasyon.
Sa makaron hay padayun ro andang pag engganyo sa nakasaksi sa krimen nga makipag angot sa andang estasyon kadungan ro pagpasiguro nga igatago ro andang pagkatawo para sa seguridad.
Handum nanda nga mataw-an it hustisya ro pagkamatay ni Garzon sa mas madali nga tiempo.
Nasayuran nga ko Setyembre 15 antes nga natabu ro insidente hay nakaangkon sigon it kaaway si Garzon sa anang kaibahan sa lingkaran kun sa siin ginasugid nga naakig ro anang kaibahan matapos nga owa nana ginbantayan ro andang copra rason nga nasunog.
Dugang pa nga naga isaeahanon eamang ro biktima sa andang baeay kat matabu ro insidente matapos nga owa idtu nagkatueog ro anang live in partner ag nag agto sa pihak nga barangay it Aparicio sa nasambit man nga banwa.
Pasado alas-12 it tungang gabi-i hay nakabati ro andang mga kaeapitbaeay it mga eahay it ayam ag iba pang sangag apang ginbalewala nanda raya.
Owa man sigon narekober sa crime scene ro mga murder weapons.
Sa pihak nga parte, ginpahayag ni Edita Tayco Amacio, kaeapitbaeay it biktima ag una nga nakakita sa bangkay nga bandang alas-7 it agahon kat gin-agtunan nana ro biktima sa anang baeay bangud nga maga-umpisa eon ro andang trabaho kat nakakita eagi imaw it mga bakas it dugo sa pader sa pagbukas it jelosi sa bintana rason nga nagpangayo it tabang sa andang kaeapitbaeay.
Samtang, gindugang pa nana nga owa sanda it mahambae sa pagkatawo it biktima ag owa man it record nga naeakot sa anuman nga krimen sa andang lugar.
Posible sigon nga una sa impluwensiya it aeak ro biktima kat matabu ro insidente rason nga owa eagi raya nakabugtaw sa pagsueod it suspek.
