KALIBO, Aklan–Nagapadayun ro imbestigasyon it kapulisan sa natabu nga pagbaril sa sangka construction worker it anang kainuman nga barangay tanod nga gintunaan it anang hinali nga kamatayon sa Sitio Ilawod, Brgy. Mantiguib sa banwa it Makato.
Suno sa testigong si Elmo Gonzales, ulihi nana nga nakita nga naga-inuman ro biktimang si Jesmar Nerval ag suspek nga si Jerry Redaniel Alyas Jerry Haba kaina it agahon sa sangka baraka sa nasambit nga lugar.
Samtang sa sueod it andang baeay, gulpi imaw nga nakabati it eupok it baril ag sa anang pagguwa nakita nana ro anang igkampod nga nagahamyangon eon.
May sangka igo sigon raya it bala halin sa kalibre .38 nga baril sa tuo nga parte it anang kilid.
Nadaea pa raya sa Aklan Provincial Hospital , apang patay eon kat maka-abot.
Samtang, boluntaryo nga nagsurender ro suspek sa andang barangay kapitan nga si jose rosia.
Ginasugid nga umpisa pa ko Enero 1 hasta kaina it agahon nag-inuman ro suspek ag biktima kaibahan ro daywang iba pa ag posibleng nakaangkon it mainitan nga diskusyon nga nagresulta sa pagbayo ni alyas labog sa biktima nga ginsundan it pagbaril it suspek.
Magkaibahan pa sigon nga nag-agto sa lamay sa andang kakilaea sa banwa it new Washington ro daywa antes nga uman nga nagsaeampitan it inom sa andang pag-uli sa makato.
