KALIBO, Aklan–Patay ro sangka construction worker samtang daywang iba pa ro naninahan matapos nga bumagsak ro sangka lumang pader sa Brgy. Poblacion, Nabas, bandang alas-4 it hapon it Huwebes, Hunyo 20.
Suno kay Fodie Laurencio, igkampod it biktimang si Andrew Vidal, sa legal nga edad ag presenteng naga-istar sa anang tiyo sa Brgy. Buenavista, Nabas nga natabu ro aksidente samtang naga-obra sanda it drainage system nga proyekto it lokal nga gobyerno it Nabas may daywang domingo pa eamang ro nagtaliwan.
Samtang, nagakutkot sigon sanda kaibahan ro daywang iba pang katrabaho kat gulping bumagsak ro lumang pader sa andang ginatrabahuhan.
Maswerteng nakadaeagan ro anang mga katrabaho ag imaw eamang ro napuruhan.
Ginsinggitan pa sigon sanda it ibang kaibahan sa pagbagsak it pader, apang owa nabatian it biktima nga medyu may diperensiya sa paeamatin-an.
Insigidang gin-rescue ro biktima it mga rumespondeng katapo it MDRRMO-Nabas, apang gindeklarang dead on arrival sa Ibajay district hospital bangud sa grabeng lastro sa anang ueo.
Nagpaabot eon man suno kana it nagakaigo nga bulig ro contractor it proyekto kaibahan ro pagpa-eubong.
