KALIBO, Aklan—Gin-umpisahan eon ro contact tracing sa tanan nga mga nakasalamuha it pilang mga vendors sa Kalibo Public Market nga nag-positibo sa COVID-19.
Ginkumpirma ni Market Master Abel Policarpio nga sangka vendor ro namatay ko Sabado nga adlaw samtang ro anang mister hay nagapabilin pa sa Intensive Care Unit ukon ICU bangud sa komplikasyon it deadly virus.
Ro mag-asawa sigon hay parehong may comorbidities ag nagapanag-iya it sari-sari store sa sueod it tindahan.
Umpisa nga magtuhaw ro pandemya, raya ro kauna-unahan nga nailistang namatay sa Covid-19 sa sueod it nasambit nga merkado publiko.
Insigida man suno kana nga gin-lockdown ro andang pwesto ag owa eon nakasueod ro andang helper kat gin-quarantine ro mag-asawa.
Gindugang pa ni Policarpio nga sangka stall owner pa nga naga operate it restaurant ro nagpositibo man ag namatay sa Covid ,apang nagpundo eon raya it operasyon may daywang domingo ro nagtaliwan bangud sa mahina nga kita.
Ro nasambit nga vendor hay ginasugid nga na-stroke, apang sa pagpaidaeum sa RT-PCR test hay nagpositibo sa Coronavirus.
Samtang, ro mga napabalita nga Covid suspect nga mga stall owners hay insigida nanda nga gina-imbestigahan agud nga maabisuhan nga temporaryong ipasarado ro pwesto agud nga malikawan ro taeapnan.
Apang, kaeabanan sigon nga pagkatapos nga ma-swab test hay owa eon nagabukas ro mga raya.
Angot kara, uman nga nagpanawagan ro Market Master sa mga nagapanindahan kamana man sa mga stall owners nga hugut nga sundon ro minimum health protocol agud nga makalikaw sa virus.
Naga-usoy man sigon sanda it quarantine pass sa mga nagasueod it tindahan.
