KALIBO, Aklan—Naga-abot eon sa siyam ro kaso it Coronavirus Disease 2019 (COVID-19) sa banwa it Banga matapos nga may tatlong nadugang nga kumpirmadong kaso ro Provincial Health Office ukon PHO-Aklan.
Base sa datos it taeatapan, ro tatlo hay nagpositibo sa RT-PCR test.
Ro mag-asawa nga naga-edad it 33 ag 34 anyos ro ika-pito ag ika-siyam nga kaso it COVID-19 sa nasambit nga banwa.
Nakaangkon sanda it close contact sa sangka covid positive nga taga-banwa it Balete.
Ika-waeo nga nagpositibo ro sangka 58 anyos nga babaye nga health care worker it Aklan Provincial Hospital, kun sa siin owa raya it history of travel ag exposure sa kumpirmadong kaso.
Tanan ro mga raya hay residente it Brgy. Tabayon, Banga.
Puro asymptomatic ukon owa it ginabatyag nga sintomas ro tatlong nagpositibo sa COVID-19.
Sa makaron ro tatlong pasyente hay ginpaidaeum sa strict facility quarantine.
Samtang, ro andang mga nakasalamuha hay ginmanduan man nga mag-strict home quarantine ag ginboe-an it RT-PCR test para sa COVID-19.
Gin-lockdown man ro andang mga baeay sandig sa IATF zoning containment protocol.
Sa bilog nga probinsiya it Aklan, naga-abot eon sa 139 ro kabilugan nga numero it mga kaso it COVID-19, kun sa siin 116 eon ro nagmayad ag pito ro namatay.
