KALIBO, Aklan—Ginakabaeak-an it sangka ekonomista sa probinsiya it Aklan nga ro ‘cost of living’ sa nasyon hay magiging mahae engkaso nga maga-dere-deretso ro pagtaas it presyo it langis sa atubang it nagapadayon nga giyera sa tunga it Russia ag Ukraine.
Suno kay Mr. Ramon Quimpo, lecturer sa kolehiyo it subject nga economics nga kinahangean nga magpahaum eon ro mga pumueuyu sa pagtaas it presyo it mga nagapangunang baeak-eon tuga it sunod-sunod nga bigtime nga pagtaas it presyo it produktong petrolyo.
Maskin nga indi pa sigon maapektuhan makaron ro presyo it mga baeak-eon, apang sa gintaeana nga tiempo ukon sa masunod nga tatlong buean rason nga kinahangean nga preparahan.
Ro mga traders suno kana makaron hay nakabakae it andang stocks kat manaba pa ro petrolyo.
Bangud kara, ginpahayag ni Quimpo nga indi maduea ro posibilidad nga makaangkon it pagpataas sa sweldo it mga obrero agud nga makadungan sa inflation.
Ginpahayag pa nga bangud sa pagtaas it presyo it langis, magahina man ro pagpamakae ukon purchasing power it mga pumueuyu.
Ginsuhestiyon man nana nga bangud sa sitwasyun hay magtipid ag indi basta-basta nga magginastos.
