Ginpaiway it Sandiganbayan ro arraignment ag pre-trial proceedings kontra sa Bureau of Immigration (BI) executives ag employees nga eakot sa “pastillas” scam sa Septyembre 9.
Sa sangka resolusyon, ginpasugtan it Seventh Division it anti-graft court ro mosyon nga igapundo anay ro proceedings sa kaso nga gindihon kontra sa mga eakot kara.
Bangud kara, ro arraignment ag pre-trial kontra sa mga akusado mag-euwas kay Jeffrey Dale Salameda Ignacio nga naka-schedule ku nagtaliwan nga Hulyo 8 hay ginkansela ag uman nga gintaeana sa Septyembre 9, 2022, alas-8:30 it agahon sa SB Multi-Purpose Hall, 6/F Sandiganbayan Centennial Building.
Apang, bangud sa paeag it Coronavirus disease 2019 (COVID-19), ginmanduan ro mga akusado nga indi eon magdaea it mga kaibahan sa igapatigayon nga hearing.
Sa pihak kara, ginmanduan man ro mga law firms nga magarepresenta sa mga akusado nga ipatuman ro minimum nga numero it mga magatambong sa proceedings.
Mataeopangdan nga ku nagtaliwan nga buean it Hunyo, nagdihon ro Office of the Ombudsman it graft charges sa Sandiganbayan kontra sa 42 BI personnel nga ginasugid nga eakot sa pastillas scheme.
Sa nasambit nga scheme, madali eamang sigon ro pagsueod sa nasyon it mga banyaga nga owa it nagakaigo nga dokumento basta’t magatao eamang ro mga raya it kwarta nga nakaputos samainyok nga paper wrapper nga kapareho it pastillas.
Partikular sigon nga target it mga akusado ro pagpangayo sa mga Chinese nationals it P10,000 kada pasahero ag makaboue it kapin sa P1.43 million sa mga banyaga.
Kung siin klaro nga pag-eabag sa Section 3 it Anti-Graft and Corrupt Practices Act.
