KALIBO, Aklan—Ginpahayag it Provincial Health Office nga nagapabiling manageable ro kaso it COVID-19 sa probinsya it Aklan.
Raya hay maskin nga nagaabot eon sa 204 ro kabilugang kaso it deadly virus nga nailista sa probinsya matapos nga madugangan it pito sa sueod it sang adlaw.
Ginpaathag ni Provincial Health Officer I Dr. Cornelio Cuatchon Jr. nga ro pagpatuman it insigidang contact tracing sa mga nakahabuliho nga mga nagpositibo sa virus hay mabahoe nga bulig para inde eon raya magkalhit pa sa iba.
Mag-eowas kara, insigida man nga igapaidaeom sa quarantine ro mga matumod nga high risk contact it Covid-19 patient.
Ginpahayag dugang nga makaalarma ro padayon nga pagtinaas it local case sa Aklan apang ro importante sigon kara hay insigida sanda nga igapaidaeom sa isolation ag maboe-an it swab test ro andang mga nakahalubilo.
Samtang, ginpasiguro ni Dr. Cuatchon nga bastante pa ro quarantine facility sa probinsya kon sa siin prayoridad nanda makaron nga madugangan ro pasilidad it kada lokal nga gobyerno sa Aklan para sa andang pumueoyo nga matumod nga covid-19 patient.
Nasayuran nga ro banwa it Lezo eamang ro kauna-unahang lokla nga gobyerno nga nakapatindog it ligtas covid-19 center nga may 26 individual rooms.
