KALIBO, Aklan—Uman eon man nga nagtinaas ro kaso it COVID-19 sa Australia.
Raya ro ginkumpirma ni Bombo International Correspondent Denmark Suede it Australia.
Sa kamatuoran suno kana hay nakaangkon it extension it lockdown sa Sydney nga bantay-sarado it kapin sa 300 nga mga soldado.
Bawae man nga magguwa ro mga residente nga eampas sa limang kilometro halin sa andang baeay mag-eowas sa essential health workers.
Ro mga essential workers suno kana hay required nga magpa-swab test kada tatlong adlaw, apang raya hay libre.
Obligado man sigon sanda nga magsuksok eon man it face mask.
Ro mga naga-eabag sa protocol hay may nagakaigo nga multa nga naga-abot sa 200 hasta 1,000 dollars , kun sa siin pataas ag instrikto raya nga ginapatuman sa tanan.
Angot kara, gintaw-an it otoridad ro mga kapulisan nga magsarado it mga bukon it essential nga establisimento nga naga operate.
Kaeabanan man sigon sa ginatamaan it coronavirus sa nasambit nga nasyon hay mga pamatan-on ukon mga inunga.
