KALIBO, Aklan—Ginkasubo ni Buruanga Mayor Concepcion Labindao ro sunod-sunod nga nailistang kaso it Coronavirus Disease 2019 ukon COVID-19 sa andang banwa.
Suno kana, nagahueag eon ro andang contact tracing team agud nga matumod ro tanan nga mga nakasalamuha it mga nagpositibo sa deadly virus.
Antes raya hay nakalista sigon sanda it kapin sa 25 nga mga high risk contacts it andang pinakaunang kaso ag namatay.
Sa nasambitang numero, pito sigon kara ro nagpositibo nga insigidang ginbutang sa Ligtas COVID Center it banwa para ma-isolate kung siin kaeakip eon kara ro daywang dag-on nga ungang eaeaki ag pinakabatang COVID-19 patient.
Nag-apela man ro alkalde sa mga pumueoyo it Buruanga nga maging kalmado, indi mag-panic ag sundon gihapon ro patakaran nga ginapatuman it mga health authorities kapareho it physical distancing, pirmeng paghugas it alima ag pagsuksok it face masks ag face shield kamana man nga pabaskugon ro resistensiya ag stay at home kon owa man lang it importanteng panaw.
Sa makaron, naga-abot eon sa napueo ro nailistang kaso it COVID-19 sa Buruanga kung siin siyam kara ro presenteng naka-facility quarantined ag sambilog ro namatay.
