KALIBO, Aklan–Nagapati si Punong barangay Neil Candelario it Poblacion, Kalibo nga mas pang magataas ro numero it mga pumueuyu nga gustong magpabakuna kontra COVID-19 sa oras nga mag-umpisa eon ro mass vaccination sa banwa it kalibo.
Raya hay matapos ro ginpatigayon nga pakikipag-istorya it mga opisyal it Kalibo ag health authorities sa ginpatigayon nga barangay assembly ko nagtaliwan nga adlaw.
Aminado si kapitan Candelario nga masyadong manaba ro interesadong magpabakuna ko una sa andang ginpatigayon nga profiling bangud sa mga nababasa sa social media angot sa negatibong side effects it bakuna.
Sa barangay assembly sigon hay nasabat ro mga pagduha-duha sa bakuna kontra COVID./
Nasayuran nga nagtambong sa assembly ro mga lideres it kada organisasyon ag iba pang sector kun sa siin sanda ro responsabli nga magapaabot it impormasyon sa andang mga miyembro partikular ro importansiya it pagpabakuna.
Sa pihak nga parte, ginpahayag pa ni kapitan Candelario nga haum imaw nga unang magpabakuna para maengganyo ro mga residente nga suportahan ro COVID-19 immunization program.
Nauna eon nga nagpirma it kasugtanan ro LGU-Kalibo agud nga makabakae it bakuna sa AstraZeneca.
