KALIBO, Aklan—Nakalista it pito nga panibag-ong kaso it Coronavirus Disease 2019 ukon COVID-19 ro probinsya it Aklan, makaron nga adlaw it Dominggo.
Bangud kara, sumaka eon sa 637 ro kabilugan nga kaso it sakit sa probinsya.
Sa nasambit nga numero 34 pa ro aktibong kaso kung siin 30 ro naka-facility quarantined ag ap-at ro admitted sa Aklan Provincial Hospital.
Kaangot kara, nakalista man it daywang bag-o nga nagmayad kung siin naga-abot eon sa 581 ro total recoveries samtang nagapabilin nga 22 ro namatay.
Sa pihak kara, padayun gihapon ro pag-engganyo it health authorities sa publiko nga likawan ro pag-adto sa mga matawo nga lugar kung owa man lang it importanteng transaksyon.
Kamana man nga ugalion ro pagsuksok it face mask, face shield ag pag-obserba it physical distancing kada magguwa it panimaeay agud malikawan ro pagtaeapnan it deadly virus.
