KALIBO, Aklan–Owa eun haeos ginasapaka it mga pomoeuyo sa Thailand ro covid-19.
Suno kay Bombo International correspondent Michael Garulacan it Thailand nga apisar nga nakakalista sa gihapon sanda it mga kaso it nasambitan nga masakit hay owa eun raya masyadong ginataw-an it atensiyon it andang gobyerno kamana man ro mga pomoeuyo.
Nagapakampante eun sigon ro tanan bangud maabong posiyento it mga pomoeuyo hay bakunado eun kontra covid-19.
Ro panawagan sigon makarun it publiko hay maibalik eun ro tanan sa normal.
Samtang bangud man sa padayun nga pagnaba it mga naililistang kaso it covid-19 hay bukon eun it obligado ro mga pomoeuyo nga magsuksok it face mask.
Ro mga hospital beds man hay maabo eun nga bakante bangud ro mga nagapositibong indibidwal hay owa eun ginadaea pa sa ospital kungdi nagapaidaeum eamang sa home quarantine ag naga self-medicate hasta nga magmayad.
Ginaeauman nga sa masunod ngabuean hay maibalik eun ro face to face classes.
Samtang ginapasugtan eun man sigon it andang gobyerno ro nagkaein eain nga party kamana man nga bukas eun sanda para sa mga turistang gustong magbisita sa andang nasyon.
