KALIBO, Aklan—Mabahoe ro naging epekto it pandemya nga daea it coronavirus disease ukon covid-19 sa mga overseas Filipino workers (OFW’s) fashion designer.
Suno kay Benjamin “Benj” Dela Rosa, sangka fashion designer, tumandok it Brgy. Pook, Kalibo apang presenteng naga-istar sa Dubai, UAE nga limitado eamang makarun ro andang ginahimo nga eambong bangud haeos bukon eun it prayoridad it publiko ro pagpatigayon it mga party ag gatherings.
Maghalin man sa 100 percent nga kapasidad hay 40 percent eun lang ro andang ginabatun.
Sa pihak kara, padayun sigon ro andang pagbaton it mga costumers nga nagapatahi.
Apang hugot nga ginapatuman ro mga health protocol kapareho eamang it pagsuksok it gloves ag face mask kung nagapamakae it gamit, regular nga paggamit it hand sanitizer ag pag-obserba it social ukon physical distancing.
Nasayuran nga si Dela Rosa hay maabo eun nga naabot pag-abot sa fashion industry.
Nakabatun man it nagkaeain eain nga award.
Ro pinaka-espesyal sigon kara hay ro anang pagtahi it “wedding abaya” para sa Sheka ukon sambilog sa mga Queens sa UAE.
Imaw man ro una sa likod it mga manaming eambong nga ginasuksok it pilang ka mga sikat nga celebrities kapareho nanday Jed Madela, Edward Barber, Martin Rivera ag Daniel Matsunaga.
