KALIBO, Aklan—Ginpapanaog eon sa ‘moderate risk’ ro bilog nga probinsiya it Aklan bangud sa padayun nga pagnaba it mga bag-ong kaso it COVID-19.
Suno sa Department of Health Center for Health Development (DOH-CHD), nagnaba it negative 7% ro growth rate sa Aklan umpisa Hulyo 23 hasta Agosto 5 maghalin sa dating 12.67% nga growth rate ko Hulyo 9 hasta 22.
Mag-eowas kara, nagnaba man ro average daily attack rate sa 23.16% cases per 100,000 population sa sueod it daywang domingo sa kaparehong petsa halin sa dating 24.97% sa nagtaliwan pa nga daywang domingo.
Raya hay nagakahueugan sigon nga naghinay eon ro pagdugang it bag-ong kaso.
Nagapabilin nga manaba ukon sa moderate risk ro ‘healthcare utilization rate’ sa probinsiya sa 66.53%.
Haeos 85.84% it Covid ward beds ukon 97 sa kabilugan nga 113 ro okupado samtang 21 sa 42 nga isolation beds ag 37 sa 58 nga intensive care unit beds ro puno it mga pasyente.
Kapin sa 74% it kritikal nga kaso it Covid-19 ro naka-admit sa mga ospital sa Aklan samtang ro 20% hay severe cases.
Gintumod man it DOH-6 nga ro mga banwa it Kalibo, Makato, Ibajay ag Numancia hay nakalista it mataas nga kaso it deadly virus.
Ro probinsiya it Antique eon lang ro naeakip sa idaeum it high-risk category samtang ro Capiz, Iloilo, Negros Occidental ag Bacolod hay una sa low risk. Mag-eowas sa Aklan, ro siyudad it Iloilo hay kaibahan eon man sa moderate risk.
