KALIBO, Aklan—Ginkumpirma ni Vaccine Czar Rey C. Villaruel it LGU-Kalibo nga anuman nga adlaw hay maga-abot eon ro COVID-19 vaccine para sa banwa it Kalibo.
Suno kana nga ro pagbakae nanda it bakuna hay mabuhay eon nga na-preparahan rason nga makasigurado ro mga Kalibonhon it kapin sa 16,400 doses it nasambit nga bakuna nga ginaeauman nga maga-abot sa buean it Marso ukon sa ikaywang quarter it makaron nga dag-on.
Nakaangkon sigon sanda it paghinun-anon sa manufacturer it bakuna rason nga naeakip sa mga LGUs nga nataw-an it prayoridad nga makabaton it bakuna.
Gindugang pa ni Villaruel nga nagapahaum eon makaron ro andang vaccination team para sa pagpatigayon it simulation exercise agud nga masiguro ro maayos nga proseso it pagbakuna halin sa pagbiyahe kara sa mga storage facility hasta sa pagpatigayon ag monitoring matapos ro inoculation ukon mas vaccination.
Madumdumnan nga kaibahan sa target it LGU-Kalibo nga makabaton it bakuna hay ro forntliners, mga kubos nga senior citizens, iba pang mga magueang ag ro naeakip sa pigadong pamilya.
Sa makaron hay nagapadayun suno kana ro profiling ag pag-obre it masterlist sa mga kabarangayan.
Gin-engganyo man ni Villaruel ro mga gustong magpabakuna nga magpa-rehistro online sa kaliboaklan.gov.ph.
