National News——-Ginpasiguro ni Presidential spokesperson Harry Roque nga mabahoe ro pagagastuson it gobyerno sa pagbakae it kada dose it COVID-19 vaccine nga himo it Chinese company nga Sinovac.
Pahayag raya it opisyal sa tunga it mga kwestyon kon ham-an it nagapamilit ro gobyerno nga bak-eon ro Chinese-made vaccine, sa pihak it mas barato nga presyo it kada dose it mga bakunang himo sa Europe ag Amerika.
Ko kan-o eamang kat ginpaguwa it taeatapan ni Sen. Sonny Angara ro listahan it presyo sigon it daywang dose it mga nagapangunang COVID-19 vaccines.
Base sa listahan, pangaywa ro Sinovac sa may pinakamahae nga presyo nga nagaabot it P3,629.50.
Ro bakunang himo it Novavax ro pinakabarato sa P366.
Samtang, ro coronavirus vaccine it AstraZeneca nga ginbakae it haeos tanan nga local govenrment unit ag private sector hay kapin sa P610 ro presyo it daywang dose.
Nauna eon nga ginpahayag ni vaccine czar Carlito Galvez nga sa masunod nga buean hay magaabot eon sa nasyon ro unang 50,000 doses it Sinovac vaccine.
Kaparte sigon raya it 25-million doses nga kasugtanang ginpirmahan it Beijing ag Pilipinas.
