KALIBO, Aklan—Mas pang ginpabaskog it Land Transportation Office ukon LTO kaibahan ro Highway Patrol Group ro andang crackdown sa mga bukon it rehistradong mga saeakyan.
Suno kay Engr. Marlon Velez, hepe it LTO-Aklan nga sigidas ro andang ginahimo nga pagbantay sa mga daeanon agud nga matumod ro mga saeakyan nga nagabiyahe nga owa it nagakaigo nga papeles.
Kadungan kara, gin engganyo it LTO-aklan ro mga nagapanag-iya sa nagkaeain-eain nga saeakyan nga owa nakarehistro nga i-avail ro andang programang “Oplan Balik Rehistro”.
Base sa andang record, minimal eamang ro mga saeakyan nga owa nakarehistro sa andang ahensiya eabi eon ro mga lugar nga maeapit sa banwa it Kalibo, apang na-obserbahan sa mga maeayo ag nabukid nga banwa kapin ro mga nagapanag-iya it motorsiklo hay nagapatigayon eamang it one-time registration ag owa eon gina-update.
Maabu sigon nga benepisyo kon rehistrado ro mga ginamaneho nga saeakyan eabi eon ro pag claim it insurance engkaso nga makasumaeang it aksidente.
Samtang, kapin sa P12,000 pesos ro penalty sa pagmaneho it mga saeakyan nga expired ro rehistro kamana man nga may mabahoe raya nga epekto sa validity it andang drivers license bangud sa traffic violation.
Nauna eon nga nagpaguwa it direktiba ro hepe it PNP kabulig ro LTO nga mas pang hugtan ro kampanya kontra sa kriminalidad ag traffic violation sa tunga it waea-tuo nga mga report nga may una nga sangka puti nga van nga ginagamit it mga maeain nga elemento para sa andang kidnapping.
