KALIBO, Aklan—Gintalakay sa ginpatigayun nga public hearing it Sangguniang Bayan it Numancia ko Setyembre 13 ro planong pagtukod it crematorium facility it sangka pribadong kompanya sa Badio Municipal Cemetery.
Kaibahan sa nasambit nga pagdungog ro mga opisyales it barangay, pilang ahensya it gobyerno ag ro mismong proponent it proyekto.
Suno kay Punong Barangay Victor Crispino it Brgy. Badio sa nasambit nga banwa, dikara hay naistoryahan nanda ro mga posibleng matabo kamana man nga gin-usisa ro tanan nga detalye sa igapatindog nga pasilidad.
Naging positibo man suno kana ro sabat kara it lokal nga gobyerno.
Sa oras sigon nga ma-comply it mga raya ro ginakinahang-ean nga dokumento hay posibleng mapasugtan ro operasyon it crematorium.
Plano sigon nga ibutang ro nasambit nga crematorium facility sa likod nga porsyon it Badio Municipal Cemetery kun siin maga-renta raya it eugta sa LGU.
Nagapati si Kapitan Crispino nga mabahoe ro maibulig kara sa probinsya it Aklan eabi pa makaron nga una kita sa tunga it pandemya kung siin punuan eon ro naga-isaehanon nga crematorium sa bilog nga isla it Panay ag haeos ginabalibaran eon ro ibang bangkay nga biktima it COVID-19.
Angot kara, plano sigon ni kapitan nga magpatawag it hinun-anon sa anang nasakupan eabi eon ro mga maeapit sa lugar agud mabuoe ro andang pulso.
Nakabutang man sigon sa Memorandum of Agreement (MOA) nga engkasong magtuga it maeain nga epekto sa ikaayong eawas ro crematorium hay insigidang paga-pundohan ro operasyon kara.
