KALIBO, Aklan—Padayun nga gina-usoy makaron it mga katapo it Philippine Coast Guard (PCG)-Aklan ag Municipal Disaster Risk Reduction Management Office (MDRRMO)-Malay ro sangka crew it barge matapos nga gina-alegat nga nahueog sa baybayon nga sakop it isla it Boracay.
Suno kay Lieutenant Comm. Marlo Acevedo it PCG-Aklan, nakilaea ro biktima nga si Ronaldo Tolinero, 57, residente it Barangay Dumatad, Tangalan, Aklan ag crew it LCM Divine Providence barge.
Base sa andang paunang imbestigasyon, naga-eayag sigon ro nasambit nga barge paagto sa sheltering area halin sa Tabon port kat mataeupangdan it kapitan nga si Eddie Norico, 62, it Sagay, Negros Occidental nga owa eon sigon ro anang crew.
Bangud kara, insigida imaw nga nagpangayo it bulig agud nga mausoy ro biktima apang sa owa it swerte tuga it maeain nga tiempo hay ginpapundo anay it rescue team ro search and rescue operation para man sa andang kaeowasan.
Engkaso nga magkalma ro eawod hay pagapadayunon ro pag-usoy sa biktima.
