Kalibo Aklan —–Nagnubo ro mga krimen nga nagakatabo sa probinsya it Aklan.
Raya ro naging assessment it Aklan Police Provincial Office (APPO) kasunod sa nagapadayon nga pakikipagsukoe sa 2019 coronavirus disease (COVID-19).
Suno kay Police Staff Sargent Jane Vega, tagapaghambae it APPO, inde sigon makaron masayuran it pamunuan it pulisya kon ikalipay raya ukon ikasubo bangud nga ro kabaylo hay ro halit nga virus nga imaw makaron ro mabahoe nga paeag sa mga pumueoyo it Aklan.
May kaangtanan kara, mas kapin pa nandang ginhugtan ro pagbantay sa ap-at nga identify border control sa bilog nga probinsya it Aklan.
Raya hay bilang pagsunod eon man sa Executive Order nga ginpaguwa ni Aklan Governor Florencio Miraflores agud nga maharang insigida ro mga indibidwal nga ginadudahang carrier it nasambitang sakit.
Sa pihak suno kana it sigidas nga kampanya it pulisya hay may una gihapon nga mga pasaway partikular sa ginapatuman nga curfew sa tagsa ka banwa sa bilog nga probinsya.
Ro naka-assign sa checkpoint suno kana ro naga-assess sa mga motorista ag sa mga indibidwal kon pwede ro mga raya makaeosot.
Samtang, nagpangayo man it kooperasyon si PSSgt. Vega sa publiko agud nga inde eon magkalhit pa ro virus.
Nagpangayo man raya it pasaylo sa mga delivery nga kon amat hay nade-delay tuga it hugot ag strikto nga inspection.
Sa makaron hay naka full alert status ro bilog nga hubon it pulisya kontra sa pagsukoe sa COVID-19 pandemic.
