POLICE Report — Patay ro sangka criminology student graduate kat kuyugon it mga residente sa Malate, Manila matapos masae-an nga manakaw.
Base sa imbestigasyon nga gin-eagas sigon it biktimang si Christian Ambon ro nagtakaw it anang cellphone nga si alyas ‘Junjun.”
Naka-abot ro pag-einagsan sa sangka baeay, apang nabaligtad imaw kat nagsinggitan ro sangka babaye nga naga-istar sa baeay it manakaw.
Dikara hay nabun-an ro biktima ag ginkabuliganan nga bugbugon it mga residente sa lugar.
Suno sa ina it biktima, gumamit pa it tubo, kahoy ag ginhigtan ro alima it anang unga.
Mag-eowas sa bugbog, tadtad pa it pagbuno sa nagkaeain-eain nga parte it eawas ro biktima.
Sa pihak nga parte, ginhana pa it mga amigo it biktima nga magtabang kat mabalitaang ginabugbog raya ag para mabo-oe halin sa pagkakakuyog apang owa eon sanda it nahimo.
Mag-eowas kara, ginpaandaman pa sanda nga basi nga madaeahig sa komosyon.
Naakig man sigon ro sangka eaeaki kat ginhana nanda nga daehon sa ospital ro amigo apang owa it nagapasugit ag ginpugngan sanda.
Makataliwan ro ap-at nga adlaw sa ospital hay binawian man it hueam nga kinabuhi ro biktima nga eubus nga indi mabaton it anang pamilya.
Nagapatigayon eon it imbestigasyon ro Manila Police District (MPD) angot sa insidente.
