KALIBO, Aklan— Nagpadumdom ro Civil Service Commission (CSC)-Aklan sa mga opisyal ag empleyado it gobyerno nga maging non-partisan makaron nga 2019 midterm elections.
Suno kay Ms. Evelyn Ijar Director II it CSC-Aklan, halin sa Enero 13 hasta it hunyo 12, 2019 kon siin maga-umpisa eon ro election period hay ginabawaean ro pagtransfer, maghueag ag magre-assign it empleyado it gobyerno.
Samtang, sa Marso 29 hasta it Mayo 12, 2019 hay ginabawaean ro pag-appoint, pagpromote ag magpasaka it sweldo.
Ginpahayag dugang nga ro tanan nga una sa ahensiya it gobyerno hay indi dapat makipagbahin sa anumang political activities nga katuyuang makaangkon it boto para sa mga ginasuportahang kandidato.
Suno pa sa opisyal, nakabaehag sa laye nga hugot nga ginabawaean sa nasambitang tyempo ro pagpatigayon it political meetings ag maging ro pagpanupod it mga flyers nga may hitsura it mga kandidato.
Samtang, nagpaandam ro opisyal nga pwedeng masuspindi ukon ma-dismiss sa pwesto ro sin-o mang mapamatud-ang eakot sa pagpangampanya it mga nagapailihir nga kandidato.
Sa pihak nga parte, nag-umpisa ko Disyembre 17 ag magatapos sa Enero 16, 2019 ro pagbaton it application para sa mga interesadong magbueo it civil service examination sa Marso 17, 2019 nga igapatigayon it Civil Service Commission sa mga testing center sa Bacolod City, Roxas, Antique ag Iloilo City.
Magabuhay ro filing period sa sueod it 19-diyas rason nga ro mga interesadong aplikante hay gilayon nga magpadueong sa andang taeatapan sa nasambitang petsa ag daehon ro pila ka mga requirements kaparehas it valid I.D, application form, recent picture ag 500 pesos nga examination fee.
Samtang, iya sa probinsya it Aklan, ro filing period hay magabukas sa Mayo 6 hasta it Hunyo 5, 2019 para sa August 4, 2019 examination.
Ginpaathag nga engkasong makapasar sa professional level examination hay may tyansa nga mapermanente ukon mapromote sa trabaho sa higher level position.
Samtang sa sub-professional level hay pwede magbueo bisan ro high school graduate eamang ag pwede nga ma-employed sa first level position.
Ginpahayag dugang nga kaeabanan sa mga nakapasar sa nasambitang examination hay ro mga estudyante ag fresh graduate.
