KALIBO, Aklan—Gin-anunsyo it Civil Service Commission Regional Office VI nga magapatigayon ro ahensya it CSC Computerized Examinations ukon COMEX sa parehong Professional ag Sub-Professional levels nga maga-umpisa makaron nga buean it Mayo 2021.
Suno kay Director Leo Jamorin it CSC Aklan field office, bangud sa ginapatuman nga health protocols tuga it covid-19 pandemic, ro ginabaton eamang nanda nga aplikasyon hay ro may requests maghalin sa government agencies nga pormal nga ginsumite sa andang opisina.
Ginpaathag dugang nga ro prayoridad kara hay ro mga empleyado it gobyerno nga uwa it Civil Service eligibility ukon ro mga job order personnel kon sa siin 15 ka mga examinees eamang ro andang ma-accommodate sa kada schedule base eon man sa listahan it COMEX examinees nga andang igasumite sa CSC regional office VI.
Mag-eowas kara, ro mga mabaton nga examinees hay kinahang-ean man nga magsunod ag mag-obserba sa tanan nga ginapatuman nga minimum health protocols.
Samtang sa pihak nga parte, nakataeana eon nga iga-release umpisa sa Mayo 17, 2021 it Civil Service Commission (CSC) ro examination fee nga ginbayaran it mga registered examinees sa bilog nga region VI sa nakansela nga March 15, 2020 Civil Service Examination- Pen and Paper Test (CSE-PPT).
angot kara, nag-apela ro ahensya nga maging updated sa mga dugang nga anunsyo para sa tamang proseso sa pagbueo it refund it nasambit nga examination fee.
