Kalibo Aklan ——Ginkansela eon it Civil Service Commission (CSC) ro nakataeana kunta nga Civil Service Examination makaron nga dag-on.
Suno kay Ferdinand Macogue it CSC-Aklan, ginpakamayad it komisyon nga kanselahon ro Civil Service Examinations via Pen-and-Paper Test bilang pagsuporta eon man sa gobyerno sa padayon nga pagsukoe sa Covid-19 pandemic.
Pinaagi sa CSC Resolution No. 2000596 nga ginpaguwa ko Hunyo 16, gin-anunsyo it komisyon ro mga kanselado nga examination makaron nga dag-on agud nga taw-an it daean ro physical distancing nga hugot nga ginapatuman it national IATF agud nga indi eon magkalhit pa ro virus.
Mag-eowas sa Career Service Examination-PPT Professional ag sub-professional sa August 9 hay kanselado man ro June 21 Fire Officer Examination; Penology Officer Examination ag Basic Competency on Local Treasury Examination.
Ginkansela dugang it CSC ro pagpatigayon man it October 11 Intermediate Competency on Local Treasury Examination; Pre-Employment Test; Promotional Test ag Ethics-Oriented Personality Test.
Samtang, ro March 15, 2020 CSE PPT hay gin-re schedule sa masunod nga dag-on.
Nasayuran nga bangud sa pandemya hay bukon eamang it examination ro nakansela kundi maging ro mga maeagkuan ag international activities.
