KALIBO, Aklan—Padayun nga ginatun-an it Civil Service Commission (CSC) ro tanan nga posibilidad angot sa pagpatigayun it eksaminasyon.
Suno kay CSC-Aklan Provincial Director Mr. Leo Jamorin nga prayoridad it taeatapan nga masiguro ro kaeuwasan it mga examinee sa tunga it nagapadayun nga paeag it COVID-19 pandemic.
Suno kana, nagahueat pa sanda it opisyal nga anunsyo halin sa CSC Central Office kung hin-uno igapadayun ro Civil Service Examination nga nauna eon nga gin-suspende ko Marso 2020 bangud sa pagpanaeasa it pandemya sa nasyon.
Ginlaygayan man kara ro mga examinee nga maghueat eon lang anay samtang gina-estudyuhan pa it ahensya ro mga pagahimuon nga tikang.
Sa pihak nga parte, sambilog sa mga nakalinyada makaron nga programa it Civil Service Commission hay ro 2021 Search for Outstanding Government Workers.
Suno kay Jamorin, raya hay ginakaeakipan it tatlong kategorya: Presidential Lingkod Bayan Award; CSC Pag-asa Award ag Outstanding Public Officials and Employees ukon Dangal ng Bayan Award.
Ro nasambit nga mga award sigon hay masami nga ginatao kada buean it Setyembre ukon Oktobre kasunod it selebrasyon it Philippine Civil Service Anniversary.
Raya sigon hay dag-unan nga programa it gobyerno bilang pagtao pagpasidungog sa mga deserving nga empleyado.
