Naeksperyensyahan it Cuba ro sangka mabug-at nga dominggo sa nakataliwan nga mga dinag-on matapos mawad-an it power suplay ro haeos 10 milyong Cubano sa sueod it pilang adlaw bangud sa nationwide blackout.
Idugang pa kara ro halit nga gin-aywanan it Hurricane Oscar nga sumamad sa naaminhanan-nasidlangan it isla, nag-aywan it pilang namatay ag maeapnagon nga damages.
Para sa pilang komunidad sa Cuba, matsa naging normal eon ro krisis sa enerhiya.
Sa kasagsagan it krisis, ginpahayag it Ministro it Enerhiya ag Minahan it Cuba nga si Vicente de la O Levy, nga ro nagapangunang rason it problema hay ro grabeng economic embargo it Estados Unidos.
Suno kana, nalisdan ro Cuba nga mag-import it mga piyesa para sa pag-ayos it grid ag kueang ro suplay it gasolina para sa mga planta bangud sa embargo.
Suno mat-a sa US State Department, bukon it embargo ro rason it mga problema sa enerhiya it Cuba, kundi ro pagdumaea it gobyerno.
Nagpromisa ro Cuban minister nga magabalik sa normal ro serbisyo it kuryente, apang uman nga bumagsak ro grid, ro ika ap-at nga blackout sa sueod it 48 oras.
Naputos sa kaduoem ro mga kalye it Havana samtang ro mga residente hay nakapungko sa guwa it andang mga baeay, mismong kahayag maghalin sa mga mobile phones ro gamit hasta sa maubos ro baterya.
