CULASI, Antique – Ginaproseso eun it Culasi Municipal Police Station ro pagpasaka it kaso kontra sa 18-anyos nga suspek sa rape with homicide case sa babayi nga nasapwan nga hub-eas sa bahin it Sitio Lambangan, Culasi, Antique ku Setyembre 14.
Patay eun kat makita ro babayi sa nasambitan nga lugar ag gina-alegar nga ginhimuslan.
Natumod ro suspek bangud man sa mga witness nga nakipagkooperar, mag-euwas kara nakita man ro eambong it suspek halin sa crime scene.
Nag-aku mismo ro suspek sa anang ginhimo nga makangieidlis nga krimen.
Suno sa resulta it post-mortem examination it biktima nga may mga trauma, bruises sa nagkaeain-eain nga bahin it eawas ag may hematoma raya sa anang genitalia.
Plano man sigon nanda nga maghimo pa it autopsy sa nasambitan nga bangkay bilang dugang nga suporta sa igapasa nga dokumento sa prosecutors.
Samtang, ginahueat man nanda ro medico legal report it suspek nga hugom it aeak pa sigon kat nadakpan.
Nasayuran nga ro babayi hay may asawa nga nagatrabaho sa Manila ag may mga unga, raya man hay presenteng barangay health worker.
Matandaan nga nag-eaong eamang sigon nga magabake raya it mantika apang uwa eun nakabalik pa it buhi.
