KALIBO, Aklan—Eubus ro pagpasaeamat it 23-anyos nga estudyante nga si Mary Jane Plaza sa mga indibidwal nga nagpaabot it bulig pinansiyal ag pangamuyo para sa anang madasig nga pagmayad.
Suno kana nga pinaagi sa mga donasyon nga kwarta hay nakatipon ro anang pamilya it kantidad agud nga insigida imaw nga ma-operahan ag mailikaw sa peligro ro anang kabuhi.
Makabig sigon nga milagro ro gintau nga second life kana.
Sa pihak nga parte, gindugang pa kara nga ko adlaw nga natabu ro insidente ko gabi-i it Hunyo 27 hay imaw it prominition ukon mabaskog nga baeatyagon nga matabu ro insidente.
Ro natandaan eamang sigon nana hay nagkatueog imaw sa van samtang nagapa-uli sa isla it Boracay ag kat pagbugtaw nana hay sa ospital eon imaw.
Samtang, masyado sigon imaw nga nasorpesa sa pag-abot it anang mga barkada ko Lunes kadungan sa petsa it andang graduation.
Ginselebrar sigon nana ro anang pagtapos samtang naka-confine sa ospital.
Si Plaza nga tubong Isla it Boracay hay nagtapos kahapon, Hulyo 11, 2022 bilang cum laude sa kursong BSEd major in Mathematics sa Aklan State University – Banga Campus.
Bangud sa anang kahimtangan ag owa ginpasugtan nga makaguwa it ospital, ginpakamayad it anang mga barkada nga sorpresahon imaw, ginpasuksok it toga ag medalya ag gintaw-an it bueak.
Nasayuran nga ro estudyante hay nagpaidaeum sa operasyon sa ueo matapos tamaan it mabahoe nga bato sa ueo nga naging rason it pag-crack it anang bungo.
Nagapauli eon kunta ro biktima halin sa banwa it Ibajay kat mapag-tripan it sangka hilong nga eapgon ro anang ginasakyan nga van.
Nauna eon nga ginpahayag ni Loren Joy Plaza, igmanghud it daeaga nga pwede eon kunta nga makaguwa si Mary Jane apang kueang pa ro andang pambayad sa ospital.
