Kalibo Aklan ——Ginpasiguro it Department of Agriculture (DA) nga magapadayon ro pagsueod sa probinsya it Aklan it mga agriculture ag poultry products halin sa mga kaeapit nga probinsya agud nga masiguro ro supply it pagkaon samtang una sa Extended Enhanced Community Quarantine ro bilog nga probinsya.
Suno kay Glen Mariano it DA-Aklan, ginasiguro sigon it ahensya nga bastante ag tayuyon ro suplay it basic food commodities sa mga pampublikong merkado agud nga may mabakae ro mga pumeuyo.
May kaangtanan kara, hugot sigon nanda nga ginabantayan ro mga presyo it mga nagapangunang baeak-eon sa merkado para uwa it negosyanteng magapamintaha sa tyempo it krisis.
Pag-abot sigon sa delivery it pagkaon hay uwa it magiging problema kara kon may mga nagakaigong dokumento nga ginabuytan ro sakay it delivery van ag ro mismong behikulo bangud nga may gintaea nga food lane para kanda ag giin-isyuhan ro mga raya it food pass para sa mas madasig nga pagdeliver it pagkaon.
Mag-eowas kara, ginklaro ni Mariano nga ro mga maga-deliver it pagkaon hay magaagi gihapon sa body temperature scan para masiguro nga uwa sanda it sintomas it coronavirus disease 2019 (COVID-19) kaparehas it eagnat, sip-on ag ubo.
