Magatao it fuel subsidy ro Department of Agriculture sa mga mangunguma ag mangingisda sa Western Visayas agud mabuhinan ro epekto it padayon nga pagtaas it presyo it langis nga tuga it tensyon sa Middle East.
Suno kay Maria Teresa Solis it DA Region 6, makabaton it bulig it pinansyal ro mga kwalipikadong benepisyaryo, maskin nga bukon pa pinal ro kabilugang numero.
Sa idaeom it programa, makabaton it ₱5,000 ro kada mangunguma ag ₱3,000 sa kada mangingisda agud makabulig sa gastuson sa operasyon kaparehas it paggamit it makinarya sa taeamnan ag baroto nga pangisda.
Nagtaeana ro gobyerno nasyonal it ₱100 milyon para sa insigidang pagpanupod makaron nga buean halin sa nabilin nga pondo it fuel subsidy sa 2025 budget it DA.
Kaibahan kara ro ₱50 milyon para sa kueang-kueang 9,700 nga mangunguma ag ₱50 milyon para sa kapin sa 15,000 nga mangingisda nga nakarehistro sa Registry System for Basic Sectors in Agriculture.
Samtang, ginatun-an man it DA ro paggamit it ₱10 bilyong pondo halin sa Presidential Assistance to Farmers and Fisherfolk kon magapadayon ro krisis sa Middle East ag kapin pang magataas ro presyo it langis.
Ro nasambit nga programa hay nagatao it hasta sa ₱10,000 cash aid sa mga trabahador sa agrikultura kon may kalamidad.
Ginpahayag pa it DA nga ginapadasig eon it mga ahensya kaparehas it Bureau of Fisheries and Aquatic Resources ro pagpanupod eagi it bulig agud insigidang mabuligan ro mga mangunguma ag mangingisda nga apektado it pagtaas it gastos sa produksyon it pagkaon.
