KALIBO, Aklan—Nagpanupod it makinarya sa pagpanguma ro Deparment of Agriculture sa sangka rehistradong asosasyon it mangunguma sa banwa it Kalibo.
Suno kay Uriel Las Piñas it Office of Municipal Agriculture nga raya hay sa idaeum it mechanization program nga nagatuyo nga mapamayad ro ani ag kita it mga farmers ag indi maulihi ro andang ikasarang sa pagpanguma sa ibang mga kaeapit nasyon pinaagi sa nagakabagay nga teknolohiya ag makinarya.
Ro nasambit sigon nga makinarya hay gin-request it munisipyo it Kalibo para sa Bahkaw Norte Integrated Farmers Association.
Nagbaton sanda it sangka unit it power tiller hand tractor ukon cultivator nga makabulig sigon it mabahoe sa andang pagtanum it mga tinuean-on ag mais.
Ginpahayag dugang nga ro nasambit nga klase it mga programa it national government hay naka-abot sa mga mangunguma pinaagi sa DA ag sa pakikipagbueuligan it provincial government ag lokal nga gobyerno it Kalibo ag ko andang taeatapan.
