Pagaumpisahan eon makaron nga buean it Agosto ro trial para sa 150,000 nga bakuna kontra sa African Swine Fever(ASF).
Suno sa Department of Agriculture, magapaidaeom sa controlled trial ro 150,000 doses it AVAC African swine fever (ASF) vaccine halin sa Vietnam ag ginaeauman nga magapadayon hasta sa buean it Setyembre.
Suno kay DA Secretary Francisco Tiu Laurel Jr., ro mga nasambit nga bakuna hay igatanyag it libre sa mga commercial farm, semi-commercial, ag mga clustered backyard farms sa idaeom it istriktong superbisyon it ahensya.
Nauna eon nga nagtaeana ro ahensya it hasta sa P350 million pesos nga pondo para makabakae it hasta sa 600,000 nga bakuna.
Ro nasambit nga trial hay igapatigayon sa mga lugar nga nakalista it maeapad nga epekto it African Swine Fever, particular eon sa Batangas ag Mindoro.
Igaturok ro mga bakuna sa mga grower ag mga fattener nga baboy.
Kon matumod nga epektibo ro bakuna, igaendorso raya sa Food and Drug Administration para sa final approval ag registration para sa commercial use.
