KALIBO, Aklan–Uman nga ginklaro it pamunuan it Department of Agriculture (DA) Western Visayas nga ro mga mangunguma it mais ag mangingisda eamang ro kwalipikadong magbaton it fuel subsidy halin sa gobyerno.
Apang, ginpaathag ni Engr. Remelyn Recoter, Regional Director it DA Western Visayas nga bukon it tanan nga corn farmer ag fisher folks hay makabaton it subsidiya.
Suno kana, ro kwalipikado nga magbaton it ayuda hay ro mga mangunguma it mais nga naka-rehistro sa Registry System for Basic Sectors in Agriculture (RSBSA) ag may una nga ginagamit nga makinarya sa produksyon.
Samtang, ro mga mangingisda man hay dapat nga naka-rehistro sa Fish Registry it Bureau of Fisheries and Aquatic Resources (BFAR) ag may motorized banca nga naka-rehistro sa Boat Registry it natungdan nga ahensya.
Ginabuebanta nga naga-abot sa masobra 3,200 nga mga inidbidwal nga miyembro it asosasyon sa bilog nga rehiyon ro nakataeana nga magbaton it subsidiya.
Nasayuran nga naga-abot sa P500 milyon ro gintaeana it gobyerno para sa unang tranche it fuel subsidy rollout kung siin ginaeauman nga makabaton it P3,000 ro kada benepisyaryo sa pamaagi it andang voucher nga pwede nanda nga gamiton sa tanan nga fuel stations nga accredited it gobyerno sa bilog nga nasyon.
