KALIBO, Aklan—Uwa pa gina-engganyo makaron it Department of Agriculture nga mag-alaga it uman it baboy matapos ro pagpanaeasa it African Swine Fever ukon ASF virus ag sa baylo hay magshift eon lang anay sa ibang livelihood nga siguradong makaangkon it kita.
Suno kay Regional Executive Director Dennis R. Arpia it Department of Agriculture (DA) Western Visayas, bukon pa it eowas makaron nga mag-alaga it baboy apang kon engkaso gidman nga inde mapunggan it mga hog raisers nga mag-alaga it uman it nasambit nga sapat eabi eon sa mga lugar nga amat-amat nga nakakarekober hay kinahang-ean nga may striktong biosecurity measures.
Ginpahayag dugang ni Arpia nga haom ro Department of Agriculture nga asistiran ro mga raya para mausisa anay ro lugar kon pwede eon nga makaalaga it uman it baboy.
Ginlaygayan pa nana ro mga hog raisers nga una sa red zone area nga inde gid anay magrisgo ag patahawon anay bangud nga bukon it basta-basta ro virus nga umagi sa probinsya nga ginkaduea it pangabuhian ag pagkalugi it mga negosyante.
