BALITA Espesyal– Sangka babaye sa India ro nabisto nga ginaputoe kada gabi-i ro kuryente it andang village para magdueom ro palibot ag owa it makakita nga nakikipag-date imaw sa anang boyfriend!
Masobra sa sang domingo eon nga problema it mga residente it sangka village sa Bettiah ro kada gabi-i eon lang nga power outage sa andang lugar.
Sa sunud-sunod nga gabi-i nga owa it kuryente, naging eapnaag ro panakawan rason nga ginpukaw ro atensyon it electric company nga ayuson ro nasambit nga problema.
Apang nakibot sanda kat masayuran nga owa it infrastructure issue ro electric company ag ro andang village eang ro naduduea-an it kuryente.
Nakaangkon it pagduda ro mga residente nga may nagasabotahe sa andang power supply rason nga nag-assign sanda it mga magaronda kada gabi-i para madakpan ro naga-obra kara.
Sang gabi-i, nadakpan it mga nagaroronda ro daeagang si Priti Kumari nga nakikipagkita kay Rajkumar, sangka soltero nga residente it pihak nga village.
Nabisto nanda nga ro daeagang si Priti ro nagapatay it power supply kada gabi-i ag kon tapos eon nga makipag-date kay Rajkumar, ginabuksan nana it uman ro kuryente.
Ginbugbog it mga tanod si Rajkumar apang nagtawag raya it resbak halin sa anang village.
Nakaangkon it mabahoe nga kinagamo ag ginkinahangean nga magpatunga ro mga pulis para mapundo ro rambulan.
Agud nga matapos eon ro awayan ag brownout, nagdesisyon ro mga lider sa andang lugar nga ipakasae eon sanday Priti ag Rajkumar.
Ginkasae ro mag-nobyo sa sangka templo nga gintambungan it mga residente it magtimbang nga village.
