KALIBO, AKLAN — Ginreklamo it pagpanghimueos it sangka 18-anyos nga daeaga ro sangka nagpakilaeang Orthodox priest nga nagpakuno-kunong ahente it National Bureau of Investigation (NBI) sa Madalag, Aklan.
Ginkilaea ro nadakpan nga suspek nga si Rev. Fr. Manuel Saison, Jr., bueag sa asawa ag residente it San Mateo, Rizal, apang temporaryong naga-istar sa Brgy. Alas-as sa nasambitang banwa.
Suno sa biktimang si alyas Ria, nagkakilaea sanda it suspek kat imaw hay 17-anyos pa eamang kat magpabueong raya kana bangud sigon sa pagsanib kana it maeain nga espiritu.
Ginasugid nga buean it Disyembre, Enero ag Marso natabo ro pagpanghimueos kana it haeos ap-at nga beses kon sa siin ginaboe-an sigon it video it pari samtang ginapatigayon ro paghimueos kana.
Ginadaea sigon imaw it suspek sa hotel ag idto ginapansamantalahan.
Naging sunod-sunuran sigon imaw sa gusto it suspek bangud sa mga paeag sa kabuhi it anang pamilya ag ipakalhit ro maseselang video nanda ag hub-eas kara nga litrato.
Ro suspek hay mahimong magapangatubang sa patong-patong nga kaso partikular ro rape, anti-photo and video voyeurism law ag usurpation of authority.
