KALIBO, Aklan—Nagtuga it kapyerdihan sa sangka tindera matapos nga mabiktima raya it peke nga kwarta sa andang pwesto nga talipapa sa Brgy. Mabilo, Kalibo.
Suno kay Alyas Nene, uwa gid imaw nakataeopangod nga peke ro P1,000 peso bill nga binayad kana it nagbakae it bangus nga isda sa balor nga P68 pesos.
Angot kara, ginsinsilyuhan pa nana ro sang libo nga gilayon man nga nagpasaeamat ro suspek nga nakamotorsiklo, nakahelmet ag may angkas nga binatilyo.
Natabo sigon ro insidente kat maabo ro nagabakae kana ag ro kwarta hay nakapilo kon sa siin uwa eon nana raya pag-usisa-a pa hasta nga ro anang nanay mismo ro nag-imporma kana nga peke ro anang nabaton nga kwarta halin sa anang customer.
Bangud kara, gilayon imaw nga nagdangop sa taeatapan it Kalibo Municipal Police Station agud nga iparecord ro nasambit nga insidente.
Mabuhay eon sigon imaw nga nagabaligya it isda ag imaw pa eamang raya nakabaton it peke nga kwarta.
Ana kunta nga ibakae it gamit sa eskwelahan ro anang kita bangud nga magaumpisa eon ro andang klase.
Angot kara, ginlaygayan nana ro tanan nga manugbaligya nga usisaon gid ro kwarta nga ginabaton maskin anu kasakuon ag kunta sa mga nagahimo it makarundaya nga modus hay inde eon pag-umanon ag magpangabuhi eon lang it maayos.
