KALIBO, Aklan—Nakilaea eon it kapulisan ro pagkatawo it babayeng nakit-an nga patay sa kilid it baybay kaina it agahon sa katung-anan it baybayon nga sakop it Baybay, Makato ag Tangalan.
Ginkilaea ni PSSgt Jover Subiaga it Makato municipal police station ro bangkay nga si Myla Sistorias Nagales, 32 anyos ag residente it Brgy. Galicia sa banwa it Madalag.
Suno kay Subiaga nga nasayuran nanda ro pangaean it biktima matapos nga ginkilaea it anang pamilya nga nag agto mismo sa nasambit nga lugar.
Ro bangkay hay nakita ni Ronald Tibulan it Dapdap, Tangalan nga insigida man nga nagreport sa mga otoridad.
Samtang, plano it pamilya nga ipaidaeum sa autopsy examination ro bangkay it biktima agud nga matumod kon may foul play sa insidente.
Suno kay Mrs. Marjorie Nagales, ina it biktima nga may nakit-an nga nina sa ueo ag mga gasgas sa eawas ro bangkay it anang unga nga ginapatihan nga tuga it pagbunggo-bunggo kara bangud sa mabaskog nga sueog it tubi.
Apang agud sigon nga maduea ro pagduda hay igapausisa nanda ro anang bangkay.
Madumduman nga nauna eon nga nagpanawagan ro pamilya it biktima sa Bombo Radyo Kalibo kahapon matapos nga naduea ro biktima nga sangka special child.
Gin-aywan sigon raya it anang ina sa baeantayan it saeakyan sa Brgy. Mercedes sa nasambit nga banwa agud nga magdeliver it katre, apang sa anang pagbalik hay owa eon raya.
Indi pa matumod kon paalin nga naeumos ro biktima.
