KALIBO, Aklan—Amat-amat eon nga nagasangag ro daeagan it pulitika sa Estados Unidos.
Raya ro ginpahayag ni Bombo International Correspondent Greg Aguilar it California, USA matapos nga iga-anunsyo ni Florida Governor Ron DeSantis ro anang pagsabak sa karera para sa Republican Presidential nomination sa masunod nga domingo.
Ro kampanya sigon ni DeSantis hay magatutok sa anang record sa kontrobersiyal nga isyu angot sa “culture war”.
Igadeklara sigon ni DeSantis ro anang kandidatura sa White House race sa 2024 hin-aga it gabi-i, american time pinaagi sa pakikipag-istorya kay Elon pinaagi sa Twitter.
Dugang pa ni Aguilar nga base sa mga reports, kasunod it anunsyo ro pagsumite nana it mga nagakaigo nga paperwork sa Federal Election Commission agud nga pormal nga ilunsar ro anang kampanya para sa GOP presidential nomination.
Maskin nga maeayo pa ro eleksyon, apang nagapabilin nga nagapanguna si DeSantis sa mga nagpahayag man it interes para sa Republican nomination, kun sa siin, naunahan pa kara si dating President Donald Trump.
Antes ro anunsyo it anang kandidatura, nataeupangdan ro sigidas kara nga pakikipagpueong sa Miami makaron nga domingo sa mga maimpluwensiya ag manggaranon nga mga supporters.
Dugang pa ni Aguilar nga ginaeauman ro masandukot nga sambuwa sa Republican nomination sa tunga ni DeSantis ag Trump.
Raya ro unang kahigayunan nga ro presidential aspirant hay nagpahayag it anang kandidatura pinaagi sa bag-ong teknolohiya.
