KALIBO, Aklan–Ginatan-aw nga maging rematch ro daeagan it pulitika sa Estados Unidos sa tunga nanday dating US President Donald Trump ag US President Joe Biden.
Raya hay kasunod sa pormal nga anunsiyo ni Biden nga uman imaw nga magapailihir sa eleksyon sa masunod nga dag-on.
Suno kay Bombo International Correspondent Greg Aguilar it California, USA nga uwa pa sigon natapos ro anang trabaho sa America rason nga magasangga raya it uman sa pagka-presidente ag magiging ka-tandem gihapon si US Vice President Kamala Harris.
Angot kara, nag-angkon suno kay Aguilar it batikos ro anunsyo ni Biden maghalin sa Republican Party bangud nga may nagahambae nga magakriar eamang raya it grabeng krisis sa US.
Pila sigon sa mga ginhalimbawa nanda nga rason hay magataas ro inflation, krimen ag maabong iba pa.
Nasayuran nga pila sa posibleng makaengkwentro ni Biden sa pagkapresidente mag-eowas kay Trump hay sanday anti-vaccine activist Robert Kennedy Jr ag Florida Governor Ron DeSantis.
