KALIBO, AKLAN — Patay ro sangka 16-anyos nga dalagita kat masunggaban it tourist van ag multicab samtang nagatabok sa mational highway it Brgy. Rizal, Nabas, Aklan.
Ginkilaea ni PO3 Zaldy Belen it Nabas Police station ro biktimang si Angelica Marsan, residente it Brgy. Tagarorok it nasambitang banwa.
Napunggan it mga otoridad ro nagsurender nga driver it van nga si Voltair Vidal, 41-anyos, residente it Brgy. Camaligan, Batan, Aklan, apang ro driver it pueang multicab hay insigidang nagpaeagyo matapos ro aksidente.
Base sa report, madasig nga nagtabok ro biktima paadto sa pihak nga karsada kon sa siin nagahueat ro anang nobyo.
Matapos nga masunggaban it van hay inapok ro dalagita sa pihak nga linya nga tyempo man nga nagaagi ro nagaragasang multicab kabangdanan nga gin-arado ro biktima.
Insigida raya nga gindaea sa Ibajay District Hospital apang gindeklarang dead on arrival bangud man sa naangkon nga fatal nga lastro sa ueo ag iba pang parte it eawas.
