Dalawang grupo ang nagtangkang magsumite noong Huwebes ng ikalawa at ikatlong impeachment complaint laban kay Pangulong Ferdinand Marcos Jr. kaugnay ng alegasyong pakinabang mula sa mga kuwestiyonableng proyekto sa flood control.
Ang ikatlong reklamo ay inihain ng mga dating kongresista at abogado, na sinusuportahan umano ng ilang mambabatas, at dinaluhan ng dating gobernador ng Ilocos Sur na si Luis “Chavit” Singson. Gayunman, hindi ito tinanggap dahil wala sa opisina ang House Secretary General, na nasa ibang bansa para sa isang opisyal na aktibidad.
Samantala, mas maagang nagtungo sa Kamara ang mga progresibo at civil society groups upang ihain ang ikalawang impeachment complaint na inendorso ng Makabayan bloc. Hindi rin ito tinanggap ng tanggapan dahil sa isyu ng awtoridad ng tumanggap.
Sa kabila nito, iniwan ng dalawang grupo ang kani-kanilang reklamo sa Office of the Secretary General at iginiit na ang mga ito ay maituturing nang naisumite batay sa House Rules. Isinasaalang-alang ng ilan sa mga naghain ang iba pang legal na hakbang upang maisulong ang mga reklamo.
