KALIBO, AKLAN — Plano nga estudyuhan it Bureau of Fisheries and Aquatic Resources (BFAR)-Aklan ro dambulahang isda nga lapu-lapu nga pinagkaguluhan it mga manugbakae ag negosyante sa Kalibo Public Market sa Brgy. Andagao, Kalibo, Aklan.
Gina tantiya ro isda hay may kabug-aton nga masobra sa 200 kilos ag haba nga sa 7 hasta it 8 feet.
Ro nasambitang isda hay nadakpan sa baybayong sakop it Pandan, Antique.
Raya hay gin bakae it negosyanteng si Arnold Constantino nga iga baligya kara sa anang mga suki.
Samtang, uman nga nagkagulo ro mga tawo sa tindahan matapos makit-an it matansero sa tiyan it isda ro chapa it sangka security guard.
Suno kay Constantino nga bukon it raya ro unang kahigayunan nga may gin daeang mabahoe nga isda sa tindahan.
Ro insidente hay nagtuga it paggutok it daeagan it trapiko sa lugar bangud sa pagbuhos it mga usyusero.
Gina kabig ro nadakpan nga isda nga mother fish ag padayun nga gina estudyuhan kun pilang dag-un eon raya.
