Kalibo Aklan ——-Nagapadayon pa ro imbestigasyon it Bureau of Fire Protection (BFP) sa nag-eontad nga sunog sa Sitio Mabais, Brgy. Arcanghel Norte, Balete bandang ala-1:00 it hapon, Abril 28.
Suno kay FO2 Ralph Salazar it BFP-Balete, abo eon kat naabutan nanda ro baeay nga ginapanag-iyahan ni Ronnie Nemis matapos nga masunog.
Kapin sa 2 kilometers pa sigon ro andang ginbaktas halin sa Barangay Proper pasaka sa bukid kon sa siin nahamtang ro baeay nga naugdaw.
Inde pa sigon matumod it tag-iya kon anu ro gintunaan it kaeayo bangud nga nagadaba-daba eon ro bilog nga baeay nga human sa mix materials kat anda raya nga nataeopangdan.
May kaangtanan kara, natigayon nga nasunog ro andang mga kagamitan kaeakip eon kara ro pila ka mga appliances kon sa siin ginatantya nga masobra sa P72,000 pesos ro gin-aywanan nga danyos it nasambitang insidente.
Samtang sa pihak nga parte, ginpadumdom ni Salazar ro publiko nga sikyaron it husto ro andang mga appliances kon nakahukas raya sa saksakan antes nga aywanan bangud nga posibleng makatuga it sunog ro pagka-overheat it mga raya kamana man inde pagpabay-an ro mga ginaeaha sa kusina partikular makaron nga mainit ro panyempo.
