Kalibo Aklan ——–Ginatantiya nga naga-abot sa masobra sa P833 milyon pesos ro danyos it sunog nga tumupok sa Gaisano Grand Mall ko Huwebes it hapon, Hunyo 17 sa San Jose, Antique.
Sakop it nasambit nga kantidad ro edipisyo pa eamang ag owa pa nahuyap ro mga nasunog nga baligya sa sueod it mall.
Raya ro ginpahayag ni Fire Officer 3 Lee Altobar, arson investigator it Bureau of Fire Protection (BFP) San Jose.
Madumduman nga umabot sa general alam ukon pinakamataas nga alarma it BFP ro nasambit nga sunog, kun sa siin, ginasugid nga ro kaeayo hay naghalin sa kisame it ladies wear section sa second floor.
Haeos 33 nga fire trucks ro nagresponde sa sunog kaibahan eon kara ro fire truck it Nabas .
Sa mayad nga swerte ag owa it sin-o man nga naninahan sa insidente .
Nasayuran nga bandang alas-12:15 it hapon ko Sabado nga adlaw, Hunyo 19 eamang gindeklara ro “fire out” matapos ro masobra sa 42 oras nga pakikipagsukoe sa kaeayo .
Pagapangunahan it BFP central office ro imbestigasyon agud nga matumod ro naging ugat it sunog .
Samtang, nag apela man ro LGU sa management it mall nga indi pagpabay-an ro masobra sa 300 nga mga empleyado nga eubusan nga maduea-an it trabaho sa tunga it pandemya.
Kadungan kara, ro promisa nga pagataw-an it bulig pinansiyal ro mga apektadong trabahador sa idaeum it Assistance to Individuals in Crisis Situation .
Nauna kara, nakabaton eon ro mga workers halin sa Provincial Government it Antique it P5,000 pesos nga cash, sangka sako it bugas ag groceries.
