Kalibo Aklan ——-Naga-abot sa masobra sa P3-milyong piso ro danyos it sunog nga nagtuga it kahalitan sa pitong puwesto sa Caticlan Public Market ag daywang kaiping nga baeay .
Nag-abot sa second alarm ro nasambit nga sunog nga gina-alegar nga naghalin sa sangka pwesto nga haeos sang buean eon nga sarado bangud sa ginapatuman nga Enhanced Community Quarantine tuga it coronavirus disease (COVID-19).
Suno kay Fire Senior Insp. Lorna Parcillano, Fire Marshall it Bureau of Fire Protection (BFP -Malay), nagapadayun pa ro andang ginahimo nga imbestigasyon sa kon ano ro ginhalinan it kaeayo .
Naugdaw ro an-um nga puwesto nga puro nagabaligya it tinuean-on samtang sambilog ro partially damaged.
Nadaeahig man ro daywang kaiping nga baeay nga sangkiri nga nasunog .
Nagbuhay ro sunog it haeos sang oras antes nga natapna it mga bombero bandang alas-10:23 kabi-i.
Madasig nga nagkalhit ro kaeayo sa mga pwesto bangud nga himo ro mga raya sa light materials.
Owa man it ginreport nga naninahan sa natabu nga sunog.
Nasayuran nga antes ro insidente hay may ginrespondehan man sanda nga grass fire sa Barangay Nabaoy sa nasambit nga banwa .
Sa pihak nga parte, ginpadumdum pa ni Parcillano ro publiko nga magdahan sa grass fire makaron nga sobrang init it tiempo .
Sa makaron hay ginbutangan sigon nanda it fire line sa mga kabukiran it Malay ag ginpangtapas ro mga mataas nga halimunon .
Likawan suno kana ro magsuga sa mga kabukiran ukon basta-basta nga magpilak it mga upos it sigarilyo .
Nagpaabot man raya it mensahe sa mga nagabatikos kanda bangud sa gina-alegar nga mahinay sa pagresponde sa natabu nga fire incident.
