Ginaboeobanta nga nagaabot sa 232,875 pesos ro danyos sa nasunog nga residential ukon boarding house ag bodega sa Abierra Road, Roxas Avenue Extension, Barangay Andagao, Kalibo bandang alas-12:00 it truadlaw kahapon.
Suno kay FO2 John Vincent Nofable it Bureau of Fire Protection ukon BFP Kalibo nga haeos totally burn gid ro boarding house nga ginapanag-iyahan ni Dioleto Lopez ag bodega nga ginapanag-iyahan mat-an ni Engr. Dildo Mationg.
Umabot sigon sa ikaywang alarma ro sunog kon siin ginkinahang-ean nanda ro bulig it BFP Banga ag Malinao para maapula insigida ro kaeayo.
Ginpahayag dugang ni FO2 Nofable nga mabahoe eon ro kaeayo kat umabot sanda sa lugar kon siin mapait ro asu nga nagatimbook bangud sa mga nasunog nga pvc ag electrical equipment.
Sa makaron sigon hay padayon pa nandang ginaimbestigahan ro insidente pati eon ro ginasugid it pamilya Lopez nga posibleng hungod nga ginsunog ro lugar it ginaturo nga kabulig.
