Danyos sa nasunog nga baealigyaan it feeds, naga-abot sa P500,000

KALIBO, Aklan — Ginatantya nga masobra sa P500,000 ro danyos it nasunog nga baealigyaan it feeds nga nahamtang sa Toting Reyes Street, Kalibo.

Suno sa tag-iya nga si Patrick Valentin ag residente it Brgy. Estancia, Kalibo, kakahalin eamang nanda sa establisyimento kat gin-impormahan sanda nga nagakasunog ro andang pwesto.

Ginpahayag dugang nga may kapin sa P50,000 nga cash sa sueod it kaha antes nanda nga gin-aywanan nga posibleng naabo man bangud sa mabahoe nga kaeayo nga nag-eamon sa establisyimento.

Nagapatinti sigon sanda it iwag sa guwa ag inde pa sa makaron matumod kon halin ro kaeayo sa electrical installation.

Nasayuran nga naabo ro mga sinako sako nga mga feeds, 45 days nga isiw, mga kariton ag iba.